Ilmmiid gaskkas romána gođđá oktii otná beaivvi eallima ja árbevirolaš eallinoainnu.
Boazodoallobearášnuoraid, Sanne ja Lemme, eallin fáhkkestaga rievdá go jávkaba ilmmá luottaid haga ilmmiid gaskii. Viellja, Lemme, ráhkista mohtorcrossa ja illuda ođđa crossavuodjinšilljui. Sánne deaivá gávpogis muhtin seahkánan olbmuin gii sutnje hoahká juoga ”neavrri máná” birra. Ruovttus áhčči suhttá issorasat go šaddá sáhka dan ođđa crossašilju birra mii bilistivčče buriid guohtoneatnamiid. Lemme jávkkiha olggos ja Sánne čuovvula. Oappážagat jávkaba ilmma luotta haga ja moraš ja ohcaleapmi ruovttus lea stuoris. Buohkat báhcet imaštallat mii lea dáhpáhuvvan. Dušše crossasihkkel gávdno álggahuvvon crossabána lahka. Ilmmiid gaskkas girjjis vásihat čilgetmeahttun dáhpáhusaid ja surgadis vásáhusaid imašlaš máilmmis.
… – Áhččemin, don guhte leat almmis.
Biškkas rievddai rágasin ja bođii girdi leavttuin, ii birra, muhto njuolga oappá guvlui. Bisánii miestaga duohkái moadde lávkki eret, muhto miestta lei nu njárbat ahte oabbá oinnii čađa. Das lei máná hápmi, muhto ámadadju lei áibbas alit. Duokkot dákko lei liiki šaddan eanamin. DakŊasat ledje šaddan oaiveassái ja heaŊgájedje gitta olggiid rádjái. Vuotta čavggai čoddagis, ja vielgadas čalmmiin lei áibbas ruoksat. Dat vikkai lagabui, muhto ii sáhttán rasttidit miestaga. Doalai gitta skierris, ja rágui nu ahte eanan vel doarggistii. …